नेपाली सेनाका उपरथी अशोकराज सिग्देलको जन्ममिति ‘कैफियत’ विरुद्ध अख्तियार दुरुपयोग अनुसन्धान आयोगमा उजुरी परेको छ । २९ असोजमा रथी बढुवा सिफारिस भएका अर्का उपरथी ताराध्वज पाण्डे जन्ममिति कैफियतकै कारण राजीनामा दिएर घर हिडेपछि सिग्देल प्रधान सेनापतिको दाबेदार छन् ।
खासमा अख्तियारमा परेको उजुरीकै आधारमा जन्ममिति कैफियत प्रमाणित भएपछि प्रधान सेनापति हुने निश्चित भएका उपरथी पाण्डे राजीनामा दिएर घर हिड्न बाध्य भएका थिए । जब कि त्यस अघि महारथी प्रभुराम शर्माले पाण्डेको उमेरमा कैफियत नभएको भन्दै विज्ञप्ति प्रकाशित गराएर सफेद झुट बोलेका थिए ।
‘शैक्षिक प्रमाणपत्र र नागरिकताको उमेर छानबिन गरी कारबाही गरिपाउँ’ भन्दै हिजो ४ मंसिरमा सिग्देल विरुद्ध अख्तियारमा उजुरी परेको स्रोतले नेपालमुहारलाई बताएको छ । सिग्देल विरुद्ध परेको उजुरीको दर्ता नं. सि–०२९५६३ हो । ‘सेनाको भलो चिताउने देशभक्त नेपालीहरु’ का तर्फबाट सिग्देल विरुद्ध बेनामे उजुरी परेको नेपालमुहारलाई प्राप्त उजुरीपत्रमा देखिन्छ ।
सिग्देल विरुद्ध लेखिएको उजुरीमा उल्लेख छ, ‘शैक्षिक प्रमाणपत्रमा सिग्देलको जन्ममिति १९ माघ २०२१ रहेको छ । तर, नागरिकतामा १९ माघ २०२३ राखेर जागिर लम्ब्याउँदै गएका मात्रै छैनन्, उनी भविष्यमा सैनिक प्रमुख हुने लाइनमा छन् ।’
सेनाको सुपिङ क्याम्पसबाट जारी सिग्देलको प्रमाणपत्र तहको शैक्षिक योग्यताको प्रमाण अनुसार ०४१/०४२ मानविकी समूह (पाँचौं) ब्याचमा उनको रोल नं. १६ हो । जस अनुसार त्रिभुवन विश्वविद्यालयको दर्ता नम्वर ७०८–८४ अनुसार सिग्देलको वास्तविक प्रमाणपत्रमा जन्ममिति १९ माघ २०२१ कायम छ ।
तर, १७ असोज ०७६ को मन्त्रिपरिषद्ले उपरथीमा बढुवा गर्नु अघि सिग्देलले शैक्षिक योग्यताको प्रमाणपत्रमा जन्ममिति १९ माघ २०२३ बनाएर सच्याएका स्रोतको दाबी छ । त्यसबेला विश्वविद्यालयको कानून समितिको बैठक नै राखेर सिग्देलले जन्ममिति सच्याएका उक्त स्रोत बताउँछ । स्रोतका अनुसार निकै ठूलो दबाब र प्रभावमा सिग्देलले शैक्षिक प्रमाणपत्रमा जन्ममिति सच्याएका थिए ।
जानकारका शब्दमा शैक्षिक प्रमाणपत्रमा सिग्देलले जन्ममिति सच्याउँदा निकै ठूलो चलाखी गरेका छन् । त्यो चलाखी के भने जन्ममिति सच्याएको मिति १२ भदौ २०४३ नै राखेका छन् । अर्थात ०७६ असोजमा उपरथी बढुवा हुनु अघि मात्र जन्ममिति सच्चाएको भएपनि मिति पुरानो राखेका छन् । जन्ममिति सच्याएको नयाँ मिति राखेका छैनन् ।
सिग्देलको यही चलाखी, बठ्याई एवं धुर्तताका कारण उनले शैक्षिक प्रमाणपत्रमा जन्ममिति सच्याएको राजीनामा दिएर हिडेका पाण्डेको जसरी सहजै ठम्याउन कठिन छ । तर, जानकारका अनुसार पुरानो मिति राखेर पछि जन्ममिति सच्याउनु झन् ठूलो अक्षम्य ‘अपराध’ हो । सिग्देलले शैक्षिक प्रमाणपत्रमा पुरानै मिति राखेर उपरथीमा बढुवा हुने बेलामा मात्र जन्ममिति सच्याएको तथ्य ‘सेटिङ, दबाब, प्रभाव’ नगरी/नपरी विधि विज्ञान प्रयोगशालाबाट परीक्षण गरे मात्र पुष्टि हुने स्रोतको भनाइ छ ।
यद्यपि सिग्देलले जन्ममिति सच्याएको शैक्षिक योग्यताको प्रमाणपत्र विधि विज्ञान प्रयोगशालाबाट परीक्षण गर्ने संभावना एकदमै न्यून छ । किनभने जन्ममिति ठ्याक्कै पाण्डेकै जस्तो कैफियत भएपनि आश्चर्य भएन भने मिलेमतो (सेटिङ), दबाब, प्रभावमा सिग्देललाई नै प्रधान सेनापति बनाउने जंङ्गी अड्डा र सरकारको गुरुयोजना छ । त्यसैले जन्ममिति कैफियतमा ‘सेटिङ’ मै उन्मुक्ति दिलाएर सिग्देललाई नै प्रधान सेनापति बनाउने तारतम्य बनिरहेको जंङ्गी अड्डा स्रोत नेपालमुहारलाई बताउँछ ।
तस्विरः जङ्गी अड्डाको अर्काइभ, १८ असोज ०७६ मा सिग्देललाई उपरथीको दर्ज्यानी चिन्ह लगाईदिँदै तत्कालीन प्रधान सेनापति पूर्णचन्द्र थापा