काठमाडौं महानगरका दुई रुटमा आजदेखि ११ बजेसम्म रात्रिकालीन बस सेवा

काठमाडौं महानगरपालिकाले नगरबासीको सहजताका लागि आजदेखि दुई मुख्य रुटमा रात्रिकालीन बस सेवा सञ्चालन गर्दै छ। महानगरपालिकाले साझा यातायातसँग सहकार्य गरी पहिलो रुटमा लगनखेलदेखि बुढानिलकण्ठ र दोस्रोमा त्रिभुवन अन्तर्राष्ट्रिय विमानस्थलदेखि थानकोटसम्म सञ्चालन गर्नेछ ।

काठमाडौं महानगरपालिकाका अनुसार राति ८ बजेदेखि ११ बजेसम्म यी रुटमा प्रत्येक २० मिनेटको अन्तरमा यी बस उपलब्ध हुनेछन्। महानगरले प्रारम्भिक चरणमा ७ वटा बसमार्फत् सेवा सुरु गर्दैछ। यात्रालाई सुरक्षित र व्यवस्थित बनाउन प्रत्येक बसमा एक जना नगर प्रहरी राखिनेछ । प्रत्येक बसमा चारवटा सीसीटीभी क्यामरा जडान गरिएका छन्। ती क्यामेराहरुले चालक, यात्रु र सडक अगाडिको भागलाई समेट्नेछन्। क्यामेराको लाइभ निगरानी महानगरको केन्द्रीय नियन्त्रण कक्षबाट हुनेछ।

यात्राका क्रममा यात्रुको सामान छुटेमा पत्ता लगाउन सहज हुनेछ। कसैले दुर्व्यवहार प्रयास गरेमा तत्कालै नियन्त्रणमा लिइनेछ । यी बसहरु काठमाडौं महानगरपालिकासँगै ललितपुर महानगरपालिका, चन्द्रागिरि नगरपालिका र बुढानिलकण्ठ नगरपालिकाको आपसी सहकार्यमा सञ्चालन गरिएको हो। यस सेवाले रातिअबेरसम्म काम गर्ने श्रमिक, कर्मचारी र अन्य यात्रुहरुलाई सार्वजनिक सवारीको अभावमा हुने सास्ती कम गर्ने महानगरपालिकाको विस्वास छ।

त्रिभुवन अन्तर्राष्ट्रिय विमानस्थलबाट रातको उडानका लागि आवतजावत गर्ने यात्रुले पनि यो सेवा उपयोग गनृ सक्नेछन् ।