यस वर्षको ‘प्रधानसेनापति खुला म्याराथन प्रतियोगिता’मा नेपाली सेनाका अमल्दार राजन रोकायले निर्धारित दूरी दुई घण्टा १५ मिनेट ५३ सेकेन्डमा पूरा गरी प्रथम स्थान हासिल गरेका छन् ।
महाशिवरात्रि तथा नेपाली सेना दिवसका अवसरमा आयोजित उक्त प्रतियोगितामा सेनाकै हुद्धा खड्गबहादुर खड्काले दोस्रो स्थान प्राप्त गरेका सैनिक जनसम्पर्क तथा सूचना निर्देशनालले जनाएको छ ।
हाफ म्याराथनमा पुरुषतर्फ सेनाका अमल्दार गजिन्द्र राईले निर्धारित दूरी एक घण्टा चार मिनेट ४५ सेकेन्डमा पूरा गरी प्रथम भए । महिलातर्फ सन्तोषी श्रेष्ठले निर्धारित दूरी एक घण्टा १४ मिनेट ३१ सेकेन्डमा पूरा गरी प्रथम भएको निर्देशनालयले जनाएको छ ।
‘बलियो एकता, सुरक्षित राष्ट्र’ नाराका साथ आयोजित ११औँ संस्करणमा ४२।१९५ किलोमिटर खुला म्याराथन र २१ किलोमिटर हाफ म्याराथनमा महिला र पुरुष दुवै विधा समावेश गरिएको थियो ।
प्रतियोगिताअन्तर्गत १० किलोमिटर दूरीको छात्र तथा छात्रा, सैनिक अधिकृत, सैनिक सहचारी तथा पाँच किलोमिटर दूरीको आधारभूत विद्यालय तहका छात्ररछात्रा र पाँच किलोमिटर वाकाथन विधा समावेश थियो ।
प्रतियोगिताका विजयी धावकलाई प्रधानसेनापति अशोकराज सिग्देल, पूर्वप्रधानसेनापतिहरू, सैनिक श्रीमती संघकी अध्यक्ष, बलाधिकृत, नेपाल सरकारका सचिव तथा काठमाडौं महानगरपालिका प्रतिनिधिले पुरस्कार तथा प्रमाणपत्र वितरण गरे । रासस