सर्लाहीको हरिपुर नगरपालिका–१, जानकीनगरमा सडक बनाउन खनिएको खाल्डोमा जमेको पानीमा डुबेर एक बालकको मृत्यु भएको छ । जानकीनगरका दिनेश यादवका छ वर्षीय छोरा सुशान्त यादवको खाल्डोमा डुबेर मृत्यु भएको हो । हिजो मङ्गलबार बिहान १० बजेदेखि बेपत्ता भएका बालकलाई राति ११ बजेतिर सडक निर्माणका लागि जेसिबीले खनेको खाल्डोमा जमेको पानीमा मृत फेला परेका थिए ।
मृतकको शव पोष्टमार्टमका लागि प्रादेशिक अस्पताल मलङ्गवामा राखिएको छ । घटनाको सम्बन्धमा थप अनुसन्धान भइरहेको इलाका प्रहरी कार्यालय बरहथवाका प्रहरी नायब उपरीक्षक (डिएसपी) निरन्जन भट्टराईले जानकारी दिए ।
डिएसपी भट्टराईका अनुसार मध्यरातमा शव फेला परेकाले बुधबार बिहान घटनास्थलको प्रकृति मुचुल्का गरिएको छ ।