भूमि व्यवस्था, सहकारी तथा गरिबी निवारणमन्त्री प्रा डा कुमार इङ्नामले गुठी अधीनस्थ जग्गासम्बन्धी समस्या छिट्टै नै समाधान गर्ने बताएका छन् ।
भक्तपुर नगरपालिकाका प्रमुख सुनिल प्रजापतिको नेतृत्वको टोलीले आज मन्त्री इङ्नामसँग भएको छलफलमा भक्तपुर नगरपालिकाद्वारा सञ्चालित देको मिवा इतापाके आवास योजनामा रहेको गुठी अधिनष्ठ जग्गासम्बन्धी समस्या छिटै नै समाधान गर्ने प्रतिबद्धता जनाएका हुन् ।
छलफलमा आवास योजनाको हालसम्मको भौतिक विकास तथा जग्गा प्रशासनसम्बन्धी प्रगतिबारे नगरप्रमुख प्रजापतिले मन्त्री इङ्नामलाई जानकारी गराएका थिए ।
नगरप्रमुख प्रजापतिले आवास योजनाको भौतिक पूर्वाधारअन्तर्गत सडक, ढल निकास, टेवा पर्खालको कार्य अन्तिम चरणमा रहेको र जग्गा प्रशासनतर्फ आयोजना क्षेत्रको सम्पूर्ण स्वीकृत नापी नक्सा तथा श्रेष्ताअनुसार हाल कायम भएको दुई हजार ४४४ कित्ता जग्गामध्ये एक हजार २८३ कित्ता जग्गा अर्थात ५२। ५० प्रतिशत विकसित घडेरी जग्गा धनीलाई फिर्ता गरिसकेको बताए
आयोजनाको एक हजार ६५३ रोपनी जग्गामध्ये ६८ रोपनी जग्गा गुठी अधिनष्ठ रहेको र उक्त जग्गामा काठमाडौं उपत्यका विकास प्राधिकरण ऐन २०४५ को दफा १०.१.१ अनुसार आयोजना व्यवस्थापन उपसमितिको निर्णयअनुसार योगदान प्रतिशत कट्टी गरेकोमा गुठी संस्थानबाट उक्त निर्णय कार्यान्वयनमा समस्या भएको मन्त्री इङ्नामलाई उनले जानकारी गराए ।
मन्त्री इङ्नामले राज्यबाट सञ्चालित विकास आयोजनाहरूमा गुठी जग्गा समस्या रहेको आफूलाई जानकारी रहेको बताउँदै समस्या समाधानका लागि छिट्टै नै ठोस निर्णय गर्ने बताए ।
विसं २०७२ सालमै योजना स्वीकृत भइ सञ्चालन भइरहेको देको मिवा इतापाके आवास योजनामा गुठी संस्थानले समस्या समाधानमा चासो नदिएको प्रमुख प्रजापतिले बताए ।
