स्थानीय तहमा रिक्त ४२ पदको उपनिर्वाचनका लागि चार सय सात जनाको मनोनयन पत्र दर्ता भएको छ । नगरपालिकाका मेयर एक, उपमेयर एक, गाउँपालिका अध्यक्ष दुई र उपाध्यक्ष चार गरी रिक्त आठ पदका लागि ३५ महिला, ४८ पुरुष र एक अन्य गरी ८४ जना उम्मेदवारले मनोनयन पत्र दर्ता गराएका निर्वाचन आयोगले जनाएको छ ।
दुई जिल्लाका समन्वय समिति प्रमुखका लागि तीन जनाको उम्मेदवारी दर्ता भएको छ । कैलाली जिल्ला समन्वय समितिको प्रमुखमा दुई महिला र ओखलढुङ्गा जिल्ला समन्वय समितिको प्रमुखमा एक जना पुरुष उम्मेदवारको मनोनयन पत्र दर्ता भएको छ ।
गाउँपालिका र नगरपालिका वडा अध्यक्षको रिक्त ३४ पदका लागि २९ महिला, दुई सय ९३ पुरूष र एक अन्य गरी जम्मा तीन सय २३ जनाको मनोयन पत्र दर्ता भएको निर्वाचन आयोगले जारी गरेको विज्ञप्तिमा उल्लेख छ ।
धनुषा जिल्लामा सबैभन्दा धेरै, रुकुम पूर्व र बझाङ जिल्लामा सबैभन्दा कम उम्मेदवारी दर्ता भएको छ । धनुषाको धनुषाधाम नगरपालिका वडा नं १ को वडा अध्यक्ष पदमा सबैभन्दा धेरै २१ जना र रूकुम पूर्वको पुथा उत्तरगङ्गा गाउँपालिका–२ एवम् बझाङको सुर्मा गाउँपालिका–४ को वडा अध्यक्ष पदमा सबैभन्दा कम तीन÷तीन जना उम्मेदवारको मनोनयनपत्र दर्ता भएको छ ।
आज ३ मंसिर हान १० देखि अपरान्ह ३ बजेसम्म उम्मेदवारको विरोधमा उजुरी दिने र भोलि ४ मङ्सिर अपरान्ह ५ बजेसम्म उजुरी उपर जाँचबुझ तथा निर्णय गरी उम्मेदवारको नामावली प्रकाशन गर्ने कार्यक्रम छ ।
मङ्सिर ५ गते उम्मेदवारले चाहेमा आफ्नो नाम फिर्ता लिने, उम्मेदवारको अन्तिम नामावली प्रकाशन गर्ने र अपरान्ह ३ देखि ५ बजेसम्म उम्मेदवारलाई चुनाव चिह्न प्रदान गर्ने कार्यक्रम छ ।
आयोगका अनुसार मङ्सिर १६ गते बिहान ७ देखि अपराह्न ५ बजेसम्म सम्बन्धित मतदान केन्द्रमा मतदान हुनेछ ।
हेर्नुहोस् निर्वाचन आयोगको विज्ञप्ति…
