राष्ट्रिय स्वतन्त्र पार्टीका सभापति तथा पूर्वउपप्रधान तथा गृहमन्त्री रवि लामिछानेबाट सम्पत्ति शुद्धीकरण मुद्दामा २७ करोड ८९ लाखभन्दा बढी बिगो असुल गर्नुपर्ने कास्की प्रहरीले प्रतिवेदन बुझाएको छ । जिल्ला प्रहरी कार्यालय कास्कीले आज जिल्ला सरकारी वकील कार्यालय कास्कीमा बुझाएको प्रतिवेदनमध्ये सम्पत्ति शुद्धीकरण काण्डमा मात्र लामिछानेसँग २७ करोड ८९ लाखभन्दा बढी बिगो असुल गर्नुपर्ने राय दिएको स्रोतले बताएको छ ।
पोखराको सूर्यदर्शन सहकारी ठगीको अनुसन्धान प्रतिवेदनमा प्रहरीले लामिछानेसहित ५१ जनाविरुद्ध मुद्दा चलाउनुपर्ने राय दिएको छ । ५१ जना प्रतिवादीहरूबाट एक अर्ब ५१ करोड ४० लाख १९ हजार १ सय ९४ रुपैयाँ बिगो असुल गर्नुपर्ने प्रहरीको प्रतिवेदनमा उल्लेख भएको स्रोत बताउँछ ।
लामिछानेविरुद्ध सहकारी ठगी, संगठित अपराध र सम्पत्ति शुद्धीकरणको मुद्दा चलाउनुपर्ने प्रहरीको राय छ । प्रहरी प्रतिवेदन गहिराईमा अध्ययन गरेपछि जिल्ला सरकारी वकील कार्यालय कास्कीले अदालतमा मुद्दा दायर गर्नेछ । त्यसपछि लामिछानेलगायतमाथि थुनछेक बहस चल्नेछ ।
गत कार्तिक २ गते प्रहरीले लामिछानेलाई काठमाडौंमा पक्राउ गरी कास्की लगेको थियो । त्यस यता उनलाई रुपन्देशी, काठमाडौं, चितवन, पर्सा घुमाउँदै फेरि कास्की प्रहरीकै हिरासतमा लगेर थुनिरहेको छ ।
