पूर्वउपप्रधान तथा गृह मन्त्री रवि लामिछानेसँग आजबाट पर्सा जिल्ला सरकारी वकिलको कार्यालयमा बयान लिइने भएको छ। लामिछानेलाई हिजो मात्र पोखराबाट काठमाडौं हुँदै वीरगञ्ज पुर्याईएकोमा आजट बयान सुरू गर्न लागिएको हो ।
हिजो साँझ वीरगञ्ज पुर्याएर उनको स्वास्थ्य परीक्षण गरिएको थियो, जसअनुसार उनको ब्लड प्रेसर १६०–११० मापन गरिएको थियो । सहकारी ठगी प्रकरणमा पर्सामा पनि उनीविरुद्ध पक्राउ पुर्जी भएकाले प्रहरीले बयानका लागि त्यहाँ लगेको जनाएको छ ।
सहकारी ठगीको आरोपमा लामिछानेलाई गत २ कात्तिकमा काठमाडौंबाट पक्राउ गरेर पोखरा लगिएको थियो । त्यस यता उनलाई रुपन्देही, काठमाडौं, चितवनलगायत स्थानमा घुमाइँदैछ ।
जिबी राई नेतृत्वको सहकारीहरूबाट ग्यालेक्सी टेलिभजनमा लगानी गर्दा लामिछाने पनि संलग्न भएको प्रमाण भेटिएपछि उनलाई कास्की प्रहरीले पक्राउ गरेको हो । त्यसपछि सोही प्रकरणमा कास्कीसहित रूपन्देही, काठमाडौं, चितवनमा उनको बयान लिइसकेको छ । अब आज मंगलबार बिहानबाट वीरगञ्जमा उनको बयान सुरू हुनेछ ।
