सुनकोसीमा खसेको हाइलक्समा बेपत्ता तीनै जना भक्तपुर जगातीका

खोटाङको हलेसीबाट भक्तपुरको जगाती अउँदै गरेको हाइलक्स गाडी सुनकोसी नदीमा खसेको छ। सिन्धुलीको गोलान्जोर गाउँपालिका–१ कुडुलेमा उक्त हाइलक्स शनिबार अपरान्ह ५.३० बजे सुनकोसी नदीमा खसेको प्रहरी चौकी ग्वालाटार सिन्धुलीले जनाएको छ ।

हाइलक्समा ४ जना सवार थिए। चारमध्ये एक जनाले हामफालेर ज्यान जोगाएका छन्। तीन जना हाइलक्ससँगै बेपत्ता छन् ।

ग्वालाटार प्रहरीका अुनसार, घाइते र बेपत्ता सबै भक्तपुरको सुर्यविनायक नगरपालिका, जगातीका हुन् । ३२ वर्षीय अबिन बाके, ३० वर्षीय प्रनित स्यागु र ३७ वर्षीय बलराम घटुवा बेपत्ता छन्। जसमध्ये ३७ वर्षिय घटुवा हाइलक्स चालक हुन् ।

२७ वर्षीय सुशान्त कक्षपतिले भने ज्यान जोगाएका छन्। अहिले उनको प्राथमिक उपचार खुर्कोट अस्पतालमा भइरहको र अवस्था सामान्य रहेको प्रहरीले बताएको छ। बेपत्ता हाइलक्सको लोकेट भइसकेको र गोताखोर टोलीमार्फत उपकरण मिलाउने काम भइहेको प्रहरीको भनाइ छ ।