इस्लामिक रिभोलुसनरी गार्ड कर्प्सको गुप्तचर संगठनका प्रमुख माजिद खादेमीको सोमबार हत्या भएको इरानी सरकारी सञ्चारमाध्यमले जनाएको छ ।
गार्ड्सले आफ्नो टेलिग्राम च्यानलमा पोस्ट गर्दै भनेको छ, “इस्लामिक रिभोलुसनरी गार्ड कर्प्सको गुप्तचर संगठनका शक्तिशाली र शिक्षित प्रमुख मेजर जनरल माजिद खादेमी आज (सोबार) बिहानै अमेरिकी–इजरायली आपराधिक आतंकवादी हमलामा सहिद हुनुभएको छ ।”
युद्धविराम र होर्मुज जलमार्ग खोल्ने प्रस्ताव
इरान–अमेरिकाले युद्ध अन्त्य गर्ने उद्देश्यले प्रस्तावित खाका प्राप्त गरेको रोयटर्सले उल्लेख गरेको छ । उक्त प्रस्ताव सोमबारदेखि नै लागु हुन सक्ने र विश्वव्यापी ऊर्जा ढुवानीका लागि महत्त्वपूर्ण मार्ग ‘होर्मुज जलमार्ग’ पुनः खोल्न सक्ने सम्भावना रहेको बताइएको छ ।
तनाव कम गर्ने योजनाका लागि इरान र अमेरिकाबीच समन्वय तथा आदानप्रदान गरिएको बताइएको छ । यसमा दुई चरणको अवधारणा समावेश गरिएको छ । जसअन्तर्गत सुरुआतमा तत्काल युद्धविराम लागु गरिनेछ । त्यसपछि थप स्थायी सम्झौताका लागि प्रक्रिया अघि बढाइनेछ । यो खाका पाकिस्तानद्वारा तयार पारिएको जनाइएको छ । स्रोतले भनेको छ, “आज सबै पक्षमा सहमति हुनु आवश्यक छ ।”
प्रारम्भिक समझदारीलाई पाकिस्तानमार्फत इलेक्ट्रोनिक माध्यमबाट समझदारीपत्रका रूपमा औपचारिक रूप दिइने पनि जनाइएको छ ।
एजेन्सीहरु
