दशैँ, तिहार, छठ जस्ता आसन्न ठूला चाडपर्व लक्षित गरी सरकारले भदौ ३० गतेदेखि सहुलियत मूल्य पसल सञ्चालन गर्ने भएको छ । सरकारले प्रत्येक वर्ष ठूला चाडपर्व लक्षित गरी सहुलियत पसल चलाउँदै आएको छ ।
उद्योग वाणिज्य तथा आपूर्ति मन्त्रालयको भदौ ८ गतेको निर्णयानुसार खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेसनमार्फत सुपथ मूल्य पसल सञ्चालन गरिन लागेका हुन् ।
आम उपभोक्ताको हितलाई ध्यानमा राखी अत्यावश्यक खाद्य तथा उपभोग्य वस्तु सहुलियत मूल्यमा उपलब्ध गराउन चाडबाड अवधिभर यस्ता पसल सञ्चालनमा ल्याउन लागिएको मन्त्रालयको भनाइ छ । मन्त्रालयको आपूर्ति व्यवस्था तथा उपभोक्ता हित संरक्षण महाशाखा प्रमुख शिवराम पोखरेलका अनुसार सहुलियत मूल्य पसल सञ्चालनका लागि खाद्य व्यवस्था कम्पनी र साल्ट ट्रेडिङलाई परिपत्र भइसकेको छ ।
खाद्य व्यवस्था कम्पनीले सञ्चालन गर्ने सहुलियत मूल्य पसलमा सबै किसिमको चामल तथा दाल, गहुँ, चिनी र गेडागुडीमा प्रतिकिलो रु. पाँच छुट हुनेछ । चिउरा, आँटा, पिठो, मैदामा प्रतिकिलो रु. सात र खानेतेलमा पनि प्रतिलिटर रु. सात छुट हुनेछ ।
कर्णालीका रैथाने उत्पादनहरू जुम्ली मार्सी, चामल, कागुनो, चिनो, सिमी, उवा र तितेफापरमा प्रतिकिलो रु. १० छुट हुनेछ । जिरा, धनिया, चियापत्ती र जिउँदो खसी बोका तथा च्याङ्ग्राको मूल्यमा प्रतिकिलो रु। १० छुट पाइनेछ । खाद्य व्यवस्था कम्पनीले विभिन्न ४६ जिल्लामा सहुलियत मूल्य पसल सञ्चालन गर्नेछ ।
साल्ट ट्रेडिङ कर्पोरेसनले काठमाडौँ उपत्यकामा तीनवटा घुम्ती पसलसहित १५ स्थानमा सहुलियत मूल्य पसल सञ्चालन गर्नेछ । उपत्यकाबाहेक विभिन्न जिल्लामा साल्ट ट्रेडिङले सहुलियत सुविधा उपलब्ध गराउनेछ । साल्ट ट्रेडिङले नुनमा प्रतिकिलो रु. दुई, चिनीमा प्रतिकिलो रु. पाँच, तेलमा प्रतिलिटर रु. सात र चिउरा, दाल, पिठो तथा मैदामा प्रतिकिलो समान रु. सात छुट दिनेछ ।
यस्ता पसलबाट बजार मूल्य नियन्त्रण र गुणस्तरीयता कायम गरी सरल, सहज र सर्वसुलभ रूपमा उपलब्ध गराउने उद्देश्य मन्त्रालयले राखेको छ ।
