प्रतिनिधिसभा बैठक बस्दै नबसी स्थगित भएको छ । आज दिउँसो १ बजेका लागि बोलाइएको बैठक आइतबारसम्मका लागि स्थगित गरिएको हो ।
सभामुख देवराज घिमिरेको सचिवालयका अनुसार अर्को बैठक पर्सी आइतबार दिउँसो १ बजे डाकिएको छ । भिजिट भिसा प्रकरणमा गृहमन्त्री रमेश लेखकको राजीनामा माग गर्दै विपक्षी दलहरूले संसद् चल्न दिएका छैनन् । बैठक चल्न नसकेपछि सभामुख देवराज घिमिरेले निरन्तर विपक्षी दलका नेताहरूसँग छलफल गरेका छन् ।
आजै मात्र विपक्षीहरुले गृहमन्त्री लेखकले राजीनामा नदिएपनि छानबिनका लागि समिति बनाउने प्रतिवद्धता सरकारबाट आउनु पर्ने माग राखेका थिए । सरकार त्यसमा समेत लचक नभएपछि प्रतिनिधिसभा बैठक बस्दै नबसी स्थगित गरिएको हो ।
