फेदीखोला हाईड्रोपावर कम्पनी लिमिटेडमा रुपान्तरण भएपछि कम्पनीको पहिलो साधारणसभामा हिजो साउन ३० गते शुक्रबार डिडिआई बैक्वेट बुद्धनगरमा सम्पन्न भएको छ । साधारणसभामा कम्पनीले भोजपुरको साल्पासिलिछो गा.पा. वडा नं ६ मा बहने फेदीखोलामा (थुमलुङ्ग) मा निर्माण गरिरहेको आयोजना ४.३ मे.वा. वि.सं. २०८२ पौष अन्तिम सम्ममा सम्पन्न गर्ने जानकारी दिएको छ ।
साधारणसभामा आयोजनाको निर्माण सम्पन्न गर्न रु. ९४ करोड लाग्ने अनुमान गरिएकोमा २०८१ साल श्रावण १५ गतेको बाढीको कारणले ४ करोड लागत वृद्धी भई ९८ करोड लाग्ने र जसको ४९ प्रतिशत अर्थात् ४८ करोड स्वपूँजी शेयर धनीहरूबाट र बाँकी ५१ प्रतिशत अर्थात ५० करोड राष्टिय बाणिज्य बैक लि. बाट ऋण स्वरुप जुटाईएको कम्पनीले जानकारी दिएको छ ।
साधारणसभाले कम्पनीको अधिकृत पुँजी ६० करोडमा १० थप गरी ७० करोड पुर्याउने र सोको २५ प्रतिशत अर्थात् १७ करोड ५० लाखको सर्वसाधारणका लागि शेयर निस्कासन गर्ने निर्णय गर्दै कार्यान्वयनका लागि संचालक समितिलाई अख्तियारी दिएको छ ।
यसैगरी साधारणसभाले वन्डर्स ईनर्जी प्रा. लि. (खिम्ती घ्वाङ्ग खोला ज.वि.आ. ९ मे.वा.) मा रु. ५ करोड लगानी गर्ने प्रतिवद्धता सहित १ करोड र इस्र्टन ईनर्जी प्रा. लि. (ईर्खुवा खोला ज.वि.आ. १५ मे.वा.) मा रु. १५ करोड लगानी गर्ने प्रतिवद्धता सहित २ करोड ५० लाख गरेको लगानी पारित गरेको छ । कम्पनीको मुख्य लगानीमा वि.सं. २०९० साल भित्र कम्तीमा १०० मे.वा. क्षमताको आयोजना अगाडी बढाउने निर्णय समेत गरेको छ ।
कम्पनीको नियमावली कम्पनीमा ५ जना सञ्चालकहरू रहनेमा अगामी कार्यकाल ४ वर्षको लागि संस्थापक (क) समूह बाट ३ जना चन्द्र प्रसाद वास्तोला, प्रकाश चन्द्र दुलाल र कविता अधिकारीलाई चयन गरेको कम्पनीले जनाएको छ ।
