पहिरोले मध्यपहाडी लोकमार्ग अवरुद्ध भएको छ। पहिरोले सिन्धुलीको खुर्कोट–घुर्मी खण्ड अवरुद्ध भएको हो।
सिन्धुलीको गोलन्जोर गाउँपालिका-७ अक्करे भीरमा पहिरो, ढुङ्गा र माटोसहितको लेदोका कारण सडक अवरुद्ध भएको हो। बिहिबार बिहान पौने ६ बजेदेखि दुवैतर्फको सडक अवरुद्ध भएको सिन्धुलीका प्रहरी प्रमुख गोविन्दराज काफ्लेले बताए।
अवरुद्ध खडक खुलाउन इलाका प्रहरी कार्यालय खुर्कोट र प्रहरी चौकी ग्वाल्टारका प्रहरी उक्त स्थानमा पुगिसकेको काफ्लेले जानकारी दिए। सडक अवरुद्ध हुँदा पहाडी जिल्लाहरु खोटाङ, ओखलढुंगा, सोलुखुम्बुबाट राजधानी काठमाडौं हिँडेका र राजधानीबाट ती जिल्ला जाँदै गरेका सवारीसाधन बीच बाटोमै अलपत्र परेका छन्।
