जेनजी आन्दोलनका क्रममा भागेर फर्किएका विराटनगरस्थित बालसुधार गृहका नौ जना बाल बिझ्याइँकर्ता हिजो (बिहीबार) साँझ सुरक्षाकर्मीलाई कुटपिट गरी फेरि भागेका छन् । फरार भएकामध्ये एक जना साँझमा आफैं सुधार गृहमा फर्किएका थिए भने अर्का एक जनालाई स्थानीयले समातेर बुझाएका थिए । बाँकी सात जना भने अझै फरार छन् ।
बाल सुधार गृहमा कार्यरत कर्मचारीहरु कार्यालय बन्द गरेर घर फर्किने समय पारेर उनीहरूले समूह बनाई ड्युटीमा रहेका प्रहरीलाई कुटपिट गरी गेट खोलेर भागेका थिए । आक्रमणबाट ड्युटीमा रहेका तीन जना प्रहरी घाइते भएको बाल सुधार गृहका प्रमुख सञ्जिव न्यौपानेले बताएका छन् ।
फरार भएकामध्ये दुई जना बाल बिझ्याइँकर्ता प्रहरीको सम्पर्कमा आइसकेको र बाँकीको खोजी भइरहेको मोरङ प्रहरीका प्रमुख प्रहरी उपरीक्षक कवित कटवालले जानकारी दिए । एसपी कटवालका अनुसार भागेकाहरु सबै १८ वर्षभन्दा माथि उमेर समूहका छन् ।
बाल सुधार गृहको सुरक्षामा खटिने प्रहरीसँग हतियार नहुने र त्यहाँ २७–२८ वर्षसम्मका बिझ्याइँकर्ताहरुलाई पनि राख्नु परेकाले पटक पटक सुरक्षा चुनौती आउने गरेको छ । त्यसबाहेक बाल सुधार गृहमा क्षमता भन्दा धेरैलाई राख्नुपर्दा व्यवस्थापनमा कठिनाइ छ । १५० जना क्षमताको बाल सुधार गृह विराटनगरमा अहिले २६० जनालाई राखिएको छ । जेनजी आन्दोलनका क्रममा भागेका करिब १० जना अझै सुधार गृहमा फर्किएका छैनन् ।
यसअघि पनि पटक पटक बाल सुधार गृहबाट बिझ्याइँकर्ताहरु भाग्दै आएका थिए । विगतमा भवनबाट फालहानेर दुई तीन जना भाग्ने गरेकोमा जेनजी आन्दोलनपछि सुरक्षाका लागि खटिएका प्रहरीलाई नै आक्रमण गरेर भाग्ने घटना दोहोरिएको छ ।
