भुटानका राजा जिग्मे खेसार नाम्ग्याल वाङचुक र रानी तेत्सुन पेमा वाङचुक काठमाडौं आउँदैछन् । स्वयम्भु र बौद्ध दर्शन गर्न उनीहरु काठमाडौं उत्रन लागेका हुन् ।
सुरक्षा स्रोतका अनुसार भुटानी राजा-रानी करिब १० बजे त्रिभुवन अन्तर्राष्ट्रिय विमानस्थलमा ओर्लने छन् । उनीहरु करिब पाँच घण्टा काठमाडौंमा बसेर स्वदेश फर्कने कार्यक्रम छ । उनीहरु भारतको भ्रमणमा छन् ।
भारतबाट करिब पाँच घण्टाका लागि उनीहरु काठमाडौं आउने भएपछि सुरक्षा कडा पारिएको छ । भुटानका राजा-रानी त्रिभुवन अन्तर्राष्ट्रिय विमानस्थलमा ओर्लिएर सिधै स्वयम्भु जाने कार्यक्रम छ । त्यहाँ पूजापाठ गरिसकेपछि उनीहरु बौद्ध जाने छन् ।
बौद्धबाट त्रिभुवन अन्तराष्ट्रिय विमानस्थल फर्किएर उनीहरु दिउँसो २ः४० बजे भुटान फर्कने तालिका छ । उनीहरुको यो यात्रा नितान्त निजी भएको बताइएको छ । नेपालमा रहदा उनीहरुले सरकार तथा राजनीतिक दलका नेताहरु कसैलाई पनि भेट्ने छैनन् ।
