धुनीवेशी नगरपालिका वडा नं। ४ का वडा अध्यक्ष हरिप्रसाद सुवेदीलाई शनिवार बिहान काठमाडौँको कलङ्कीबाट प्रहरीले पक्राउ गरेको छ ।
सात महिनादेखि फरार सुवेदी सार्वजनिक किर्ते मुद्दाका फरार प्रतिवादी समेत हुन् । उनले नाबालकलाई उमेर पुगेको देखाई झुटो जन्म दर्ता प्रमाणपत्र दिएका थिए । त्यही आधारमा नागरिकता बनाई त्यसको प्रयोग गरी जग्गा बिक्री गरेको अभियोगमा जिल्ला अदालत धादिङमा मुद्दा दर्ता गरिएको थियो ।
प्रहरीको खोजी सूचीमा रहेका सुवेदीलाई पक्राउ गरेपछि थप अनुसन्धानका लागि धादिङ ल्याइएको छ । सुवेदी २०७४ सालको स्थानीय तह निर्वाचनमा नेकपा एमालेबाट तथा २०७९ सालको निर्वाचनमा नेकपा (एकीकृत समाजवादी) पार्टीबाट निर्वाचित भई वडा अध्यक्ष बनेका थिए ।
गोरखापत्र
