बंगलादेशको अन्तरिम सरकारका प्रमुख सल्लाहकार मुहम्मद युनुसले अर्बपति अमेरिकी व्यवसायी एलन मस्कलाई बंगलादेश भ्रमणको निम्तो दिएका छन् ।
उनले देशमा स्टारलिङ्क स्याटेलाइट इन्टरनेट सेवा सुरु गर्न शीर्ष अमेरिकी व्यापारी तथा स्पेसएक्सका सीईओ मस्कलाई पत्र लेख्दै बंगलादेश भ्रमणको निम्ता दिएका हुन् । फेब्रुअरी १९ मा लेखिएको पत्रमा युनुसले मस्कलाई आफ्नो बंगलादेश भ्रमणले यस अग्रणी प्रविधिका मुख्य लाभार्थीहरूमध्ये एक हुने युवा बंगलादेशी पुरुष र महिलाहरूलाई भेट्ने अवसर दिने बताएका थिए ।
उनले मस्कलाई राम्रो भविष्यको लागि उनीहरूको पारस्परिक दृष्टिकोणलाई साकार पार्न सँगै काम गर्न आह्वान गरेका छन् ।
बंगलादेशको पूर्वाधारमा स्टारलिङ्कको कनेक्टिभिटीले रूपान्तरणकारी प्रभाव पार्ने, सरकारी समाचार एजेन्सी बीएसएसले रिपोर्ट गरेको छ । यसले विशेष गरी बंगलादेशका उद्यमी युवाहरू, ग्रामीण र कमजोर महिलाहरू, र दुर्गम र वञ्चित समुदायहरूलाई फाइदा पुर्याउने रिपोर्टमा उल्लेख छ ।
