प्रतिनिधिसभाको आज १० असारमा बस्ने बैठकबाट विनियोजन विधेयक, २०८२ पारित गरिने भएको छ। जिनियोजन विधेयक पारित गर्नका लागि प्रतिनिधिसभा बैठक बिहान ११ बजे बस्दैछ । उपप्रधान एवं अर्थमन्त्री विष्णुप्रसाद पौडेलले विधेयक, २०८२ विधेयक पारित गरियोस् भन्ने प्रस्ताव बैठकमा प्रस्तुत गर्ने कार्यसूची रहेको संघीय संसद् सचिवालयले जनाएको छ।
बैठकमा अर्थमन्त्री पौडेलले ‘आर्थिक विधेयक, २०८२’ र ‘राष्ट्र ऋण उठाउने विधेयक, २०८२’ माथि विचार गरियोस् भन्ने प्रस्ताव पनि प्रस्तुत गर्ने छन् ।
बैठकको प्रारम्भमा श्रम, रोजगार तथा सामाजिक सुरक्षा, गृह, सञ्चार तथा सूचना प्रविधि, अर्थ, सहरी विकास मन्त्रालय, प्रधानमन्त्री तथा मन्त्रिपरिषद्को कार्यालय, राष्ट्रिय योजना आयोग, राष्ट्रपतिको कार्यालय र उपराष्ट्रपतिको कार्यालय अन्तर्गतका शीर्षकमाथि छलफलमा उठेका प्रश्नहरूको सम्बन्धित मन्त्रीहरूले जवाफ दिने कार्यक्रम रहेको छ।
सांसदहरू अमरेशकुमार सिंह, प्रभु साह, दुर्गा राई, प्रेम सुवाल, अमनलाल मोदी, जनार्दन शर्मा, विमला सुवेदी, रेखा शर्मा, चित्रबहादुर केसी, शक्तिबहादुर केसी, हितराज पाण्डे, रामकुमार राई, देवेन्द्र पौडेल, माधव सापकोटा, रणेन्द्र बराली, ज्ञानु बस्नेत, उर्मिला माझी, अम्मरबहादुर थापा, छिरिङल्हामु लामा तामाङ, नारायणी शर्मा, गङ्गा कार्की र लेखनाथ दाहालद्वारा प्रस्तुत खर्च कटौतीको प्रस्ताव पनि निर्णयार्थ प्रस्तुत गरिने छ।
विनियोजन विधेय पारितका पक्षमा मतदान गर्न कांग्रेस, एमालेले आफ्ना सांसदहरुलाई हिजै ह्वीप जारी गरिसकेका छन् ।
