२१ फागुनमा तोकिएको प्रतिनिधिसभा सदस्य निर्वाचनका लागि दल दर्ता गर्ने आज अन्तिम दिन हो । १० दिनको समयावधि तोकेर १ मंसिरमा निर्वाचन प्रयोजनार्थ दल दर्ता खुलाइएको थियो । उक्त निर्वाचनका लागि हिजोसम्म ८० वटा दल दर्ता भइसकेका छन् ।
निर्वाचन आयोगमा एक सय ३२ वटा दल दर्ता भएको छन् । आजसम्म दल दर्ता गर्ने दलले आगामी फागुन २१ मा हुने चुनावमा भाग लिन पाउँछन् ।
प्रत्यक्ष पहिलो निर्वाचित हुने निर्वाचन प्रणाली अन्तरगतको निर्वाचन कार्यक्रम अनुसार आगामी ६ माघमा उम्मेदवारको मनोनयन दर्ता हुनेछ । त्यही दिन बेलुका उम्मेदवारको सूची प्रकाशन हुनेछ। मनोनयन पत्र दर्ता भएका उम्मेदवारको विरोधमा उजुरी भोलिपल्ट ७ माघमा दिन पाइनेछ ।
८ माघमा उजुरी उपर जाँचबुझ एवम् मनोनयन पत्र दर्ता गरी उम्मेदवारको नामावली प्रकाशन गरिनेछ। ९ माघमा उम्मेदवारले नाम फिर्ता लिन सक्नेछन् । त्यही दिन उम्मेदवारको अन्तिम नामावली प्रकाशनगरी निर्वाचन चिह्न प्रदान गरिने छ। यसपछि प्रचार प्रसार गरिनेछ ।
