सामाजिक सञ्जालको महत्व कति हुन्छ ? फेरि एक पटक पुष्टि भएको छ । ट्राफिक प्रहरीले सर्वसाधारण यात्रुलाई सडकमा निर्घात कुटपिट गरेको फोटो सामाजिक सञ्जालमा भाइरल भएको थियो ।
त्यस लगत्तै काठमाडौं उपत्यका ट्राफिक प्रहरी कार्यालयले सर्वसाधारण व्यक्तिलाई कुटपिट गर्ने चार जना ट्राफिक प्रहरीलाई कारबाही गरेको छ । कुटपिटमा संलग्न चारजना ट्राफिक प्रहरीलाई जनसेवा, नयाँ सडकको जिम्मेवारीबाट हटाइएको ट्राफिक प्रहरीका प्रवक्ता दीपक गिरीले जानकारी दिएका छन् ।
अनुसन्धानका क्रममा गत मंसिर २३ गते सुन्धाराको आकासे पुलमुनि जनसेवाबाट खटिएका ट्राफिकले सर्वसाधारण व्यक्तिलाई कुटपिट गरेका पुष्टि भएको थियो । कुटपिटको उक्त भिडियो सामाजिक संजालमा भाइरल भएपछि ट्राफिक प्रहरी कार्यालयको ध्यानाकर्षण भएको हो ।
“प्रारम्भिक अनुसन्धान अनुसार उक्त घटना मिति २०८१ मंसिर २३ गते सुन्धारा आकासे पुलमुनिको भएको र उक्त कार्यमा संलग्न देखिएका चारजना ट्राफिक प्रहरीहरूलाई ट्राफिक प्रहरी वृत्त, जनसेवाको जिम्मेवारीबाट हटाई यस काठमाडौं उपत्यका ट्राफिक प्रहरी कार्यालयमा झिकाई आवश्यक छानबिन तथा अनुसन्धान भइरहेको व्यहोरा जानकारी गराइन्छ ” प्रवक्ता गिरिद्धारा जारी विज्ञप्तिमा भनिएको छ ।
