नेकपा (एमाले)का सांसद पदम गिरीले निजामती सेवा विधेयकको ‘कुलिङ पिरियड’ हटाउन षड्यन्त्र गर्नेलाइ कारबाही गर्नुपर्ने बताएका छन् । आज १७ असारमा सभामुख देवराज घिमिरेसँग प्रतिनिधिसभाअन्तर्गतको राज्यव्यवस्था तथा सुशासन समितिका सदस्यको छलफलपछि उनले षड्यन्त्र गर्नेले राजीनामा दिनुपर्ने बताएका हुन् ।
“महिनौँसँग लगाएर छलफल भएर दुई वर्षसम्म कुलिङ पिरियड राख्नैपर्छ भनेर निर्णय भएको हो । कुलिङ पिरियड नै मुख्यसचिव, सचिव, सहसचिवको हकमा लागु नहुने प्रकारले प्रतिवेदन बने पनि सदनबाट पारित भयो,” उनले भने । गिरिले संसद्को गरिमाको धूलिसात् भएको आरोप लगाए । षड्यन्त्रको छानबिन गर्ने विषयमा सभामुखसँग छलफल गरिएको उनले जानकारी दिए ।
“यसको टुंगो नलागेसम्म राज्यव्यवस्था तथा सुशासन समितिको बैठक अघि बढ्न सक्दैन । यसमा जिम्मेवार जोजो जिम्मेवार हुनुहुन्छ, नैतिकताको आधारमा कारबाही भोग्नुपर्छ, ठाउँ छोड्नुपर्छ,” गिरिले भने ।
