सत्तारुढ नेकपा (एमाले) ले भोलि १० असारमा सदनमा अनिवार्य उपस्थित भएर बजेटका पक्षमा मतदान गर्न ह्वीप जारी गरेको लामो समय नबित्दै नेपाली कांग्रेसले पनि प्रतिनिधिसभा बैठकमा अनिवार्य उपस्थित हुन आफ्नो पार्टीका सांसदहरूलाई निर्देशन दिएको छ ।
भोलिको प्रतिनिधिसभाबाट बजेट पारित भएको घोषणा गर्ने सत्तारुढ दलहरुको तयारी छ । बजेट निर्णयार्थ प्रस्तुत हुने उक्त संसदमा अनिवार्य उपस्थित हुन आफ्नो पार्टीका सांसदहरुलाई नेपाली कांग्रेसका प्रमुख सचेतक श्याम घिमिरेले ह्वीप जारी गरेका छन् । उनले कांग्रेस सांसदहरुलाई तटस्थ नरहन र बजेटको पक्षमा मतदान गर्न निर्देशन दिएका छन् ।
बजेट विनियोजनलाई लिएर कांग्रेस सांसदहरूले सरकार, अर्थ मन्त्री र मन्त्रीहरुलाई खरो आलोचना गरिरहेका छन् । कतिसम्म् भने कांग्रेस सांसद कान्छाराम तामाङ बजेट प्रस्तुत गर्ने उपप्रधान तथा अर्थमन्त्री विष्णु पौडेल र अर्का उपप्रधान तथा शहरी विकास मन्त्री प्रकाशमान सिंहलाई २०८४ को सनिर्वाचनपछि यो सदनमा देख्न नपरोस् भनेर पशुपति र बुद्धसँग प्रार्थना नै गरेका थिए ।
