प्रतिनिधि सभा सदस्य निर्वाचनका निम्ति हिजो मंगलबार देशभर प्रत्यक्षतर्फ १६५ पदका लागि स्वतन्त्रसहित विभिन्न ६८ वटा राजनीतिक दलबाट मनोनयन दर्ता भएको छ ।
निर्वाचन आयोगको प्रारम्भिक सूची अनुसार, देशभर तीन हजार चार सय ८४ जनाले उमेदवारी दर्ता गराएका छन् । जसमध्ये सबैभन्दा धेरै ३६ देखि ५० वर्ष उमेर समूहका उमेदवारको उमेदवारी परेको छ । ३६ देखि ५० वर्ष उमेर समूहका १६ सय १० जनाको उम्मेदवारी परेको आयोगले जनाएको छ ।
५१ देखि ६५ वर्ष उमेर समूहका एक हजार ९० उमेदवारले उमेदवारी दिएका छन् । २५ देखि ३५ वर्ष उमेर समूहका ५८३ र ६५ देखिमाथि उमेरका २०१ जनाले उमेदवारी दिएको आयोगले जनाएको छ । तीन हजार चार सय ८४ जनाले उमेदवारी दर्ता भएकामा ३९५ महिला र तीन हजार ८८ पुरुष तथा अन्य एक उमेदवार छन् ।
राजनीतिक दलको तर्फबाट दुई हजार २९७ जनाले उमेदवारी दर्ता गराएका छन् । जसमा २३५ महिला र दुई हजार ६४ पुरुष छन् । एक हजार १८७ जनाले स्वतन्त्र उमेदवारी दिएका छन् । आयोगका प्रवक्ता नारायणप्रसाद भट्टराईले प्रारम्भिक सूचीमा केही संख्या थपघट हुनसक्ने बताएका छन् ।
