कांग्रेस नेता गोपालमान श्रेष्ठले सभापति शेरबहादुर देउवा ‘संदिग्ध तानाशाही’ को गम्भीर आरोप लगाएका छन् । देउवाले कांग्रेस विभाजन गरेर कांग्रेस प्रजातान्त्रिक गठन गर्नुअघि देखि नै श्रेष्ठले उनलाई साथ दिँदै आएका थिए । उनै श्रेष्ठले विशेष महाधिवेशनको मुखमा आज देउवालाई संगीन आरोप लगायउँदै उनको साथ छाडेको घोषणा गरेका छन् ।
श्रेष्ठले युवा नेताहरु गगन थापा र विश्वप्रकाश शर्मालाई साथ दिने प्रतिबद्धता समेत जनाएका छन् । आज अपरान्ह सञ्चारकर्मीहरुसँग कुरा गर्दै श्रेष्ठले भने, “सभापतिज्यूको चरित्र संदिग्ध भयो । अझै पनि चेत पसेन । तानाशाही प्रवृत्ति दोहोर्याएको दोहोर्याइ गर्नुभयो । १४ औँ महाधिवेशनमा मैले जे गरेँ, त्यो गलत गरेको रहेँछु ।”
श्रेष्ठले आफूले देउवाबाट पटक पटक धोका पाएको पनि जिकिर गरे । उनको थप भनाइ छ, “बेइमानी कहाँ कति भयो भन्ने कुरै छाडिदिउँ । देउवाको अन्याय, ज्यादती र तानाशाही नेतृत्वलाई कति हेरेर बस्ने ? मैले अब गगन थापालाई अघि बढाउने हो ।”
