सत्ता साझेदार नेपाली कांग्रेसको आज आइतबार पदाधिकारी बैठक राख्दै छ। कांग्रेस केन्द्रीय कार्यालयका मुख्यसचिव कृष्णप्रसाद पौडेलले दिएको जानकारी अनुसार बैठक अहिले बिहान १० बजे पार्टी सभापति शेरबहादुर देउवाको निवास बुढानीलकण्ठमा बस्दैछ।
बैठकले सोमबार सुरु हुने कांग्रेसको केन्द्रीय कार्यसमिति बैठकका एजेन्डालगायत विषयमा छलफल गर्ने पौडेलले बताएका छन् । ‘भोलि १६ असारबाट केन्द्रीय कार्यसमिति बैठकका एजेन्डालगायत विषयमा छलफल गर्न पदाधिकारीहरूले छलफल गर्दै हुनुहुन्छ’, मुख्य सचिव पौडेलको भनाइ छ ।
गत फागुन १ गते बसेको कांग्रेसका पदाधिकारी तथा पूर्वपदाधिकारीको बैठकले चैत मसान्तसम्म तरुण दल, नेविसंघ, महािला संघ, थारु संघ, किसान संघ र लोकतान्त्रिक खेलकुद संघलाई महाधिवेशन गर्न निर्देशन दिएको थियो। तर यीमध्ये कुनैले पनि अझै अधिवेशन गर्न सकेका छैनन्। सोमबारदेखि हुने कांग्रेस केन्द्रीय समिति बैठकले पार्टीका भ्रातृ संस्थाका तदर्थ समितिको पदावधि थप्ने वा भंग गर्ने निर्णय गर्नेछ।
