मधेश प्रदेश प्रमुख सुमित्रा सुवेदी भण्डारीले संविधानको धारा नै छलाङ हानेर नेकपा एमाले संसदीय दलका नेता सरोजकुमार यादवलाई मुख्यमन्त्री नियुक्त गरेकी छन् । मुख्यमन्त्री जितेन्द्र सोनलले पदबाट राजीनामा दिएकाले संविधानको धारा १६८ को उपधारा ३ बमोजिम प्रदेश सभाको सबैभन्दा ठूलो दलको हैसियतमा एमाले नेता यादवलाई मुख्यमन्त्री नियुक्त गरेकी हुन् । रोचक के भने यादवलाई हिजो आइतबारकै मितिमा नियुक्ति पत्र दिइएको छ ।
प्रदेश प्रमुख भण्डारी अस्वस्थ भएको भन्दै आज बिहानै जनकपुरबाट काठमाडौं प्रस्थान गरेकी थिइन् । मुख्यमन्त्री सोनलले उनलाई स्वास्थ्य लाभको कामना गर्दै बिदाइ गरेका थिए । त्यसक्रममा पत्रकारहरुलाई प्रतिक्रिया दिँदै सोनलले प्रदेश प्रमुख भण्डारी स्वस्थ भएपछि थप राजनीतिक प्रक्रिया अघि बढ्ने बताएका थिए । ‘उहाँको छिट्टै स्वास्थ्य लाभ होस्, त्यसपछि राजनीतिक प्रक्रिया अघि बढ्छ,’ मुख्यमन्त्री सोनलले भनेका थिए ।
तर लगत्तै प्रदेश प्रमुख भण्डारीले एमाले दलका नेता सरोजकुमार यादवलाई मुख्यमन्त्री नियुक्त गरेको पत्र सार्वजनिक भएको हो । जनकपुरबाट काठमाडौँ जान भनेर हिँडेकी प्रदेश प्रमुख भण्डारीले बर्दिवासको होटलमा मुख्यमन्त्री यादवलाई शपथ गराएकी थिइन । निवर्तमान मुऋय मन्त्री सोनल संविधानको धारा १६८ को उपधारा २ बमोजिम नियुक्त भएका थिए । उनको राजीनामा स्वीकृत गरे पनि प्रदेश प्रमुख भण्डारीले सरकार गठनको आह्वान गरेकी थिइनन् ।
प्रदेश प्रमुख भण्डारीले संविधानको धारा १६८ को उपधारा ३ बमोजिम मधेश प्रदेश सभाको सबैभन्दा ठूलो दलको नाताले एमाले संसदीय दलका नेता सरोजकुमार यादवलाई मुख्यमन्त्री नियुक्त गर्ने आशंका मुख्यमन्त्री सोनलसहित गठबन्धन दलका नेताहरुले गरेका थिए । यही आशंकाका साथ गठबन्धनका नेता–कार्यकर्ताहरुले हिजो आइतबार प्रदेश प्रमुख कार्यालय र मधेश भवन अगाडि नाराबाजी गर्दै संविधानको धारा १६८ को २ बमोजिम नै सरकार गठन गर्न माग गरेका थिए । तर, जे आशंका गरिएको त्यही चोरबाटोबाट भण्डारीले यादवलाई मुख्यमन्त्री नियुक्त गरेकी छन् ।
