प्रतिनिधिसभाअन्तर्गतको शिक्षा, स्वास्थ्य तथा प्रविधि समितिले विद्यालय शिक्षा विधेयकलाई आज नै पारित गर्ने तयारी गरेको छ । समितिका सभापति अम्मरबहादुर थापाले सञ्चारकर्मीहरुलाई आजै विधेयकलाई पारित गर्ने गरी तयारी गरिएको बताएका छन् ।
“आजको बैठकबाट विधेयक पारित हुने सम्भावना छ,” उनले समितिको कार्यकक्षमा पुगेका सञ्चारकर्मीलाई भनेका छन् । विधेयकमा पदपूर्तिको विषयमा सहमति जुट्न सकेको छैन । समितिले ६० प्रतिशत आन्तरिक र ४० प्रतिशत खुला प्रतिस्पर्धाबाट पदपूर्ति गर्ने सहमति जुटाए पनि शिक्षकहरूले मानेका छैनन् ।
नेपाल शिक्षक महासंघले ७५ प्रतिशत आन्तरिक र २५ प्रतिशत खुला प्रतिस्पर्धाबाट पदपूर्ति हुनुपर्ने अडान राखेको छ । शिक्षकले आफूहरूलाई स्थानीय तह मातहतमा नराख्न् पनि अडान राखिरहेका छन् । शिक्षकको यस आग्रहलाई सुन्न दलहरुले आनाकानी गरिरहेका छन् ।
