नेकपा (माओवादी केन्द्र) को पदाधिकारी बैठक अहिले ११ बजे बस्ने भएको छ । पार्टी केन्द्रीय कार्यालय कोटेश्वर पेरिसडाँडामा बैठक बस्न लागेको प्रवक्ता अग्निप्रसाद सापकोटाले जानकारी दिएका छन् । सापकोटाका अनुसार स्थायी कमिटी बैठकमा भएका छलफलको विषयमा निर्णय गर्न पदाधिकारी बैठक बस्न लागेको हो ।
प्रवक्ता सापकोटा भन्छन्, “आजको बैठकमा यसअघि स्थायी कमिटी बैठकमा भएको छलफलमाथि निर्णय हुनेछ । पार्टीको यही भदौ २१ गतेदेखि सुरु गर्ने भनेको मध्यपहाडी लोकमार्ग जागरण अभियानबारे टुंगो लाग्न बाँकी विषयमा पािन टुंगो लगाइनेछ ।”
सापकोटाका शब्दमा विभिन्न समयमा एकतामा आएका दलका नेता कार्यकर्ताको कार्य विभाजनमाथि पनि आजको बैठकले निर्णय गर्नेछ । नेपाल समाजवादी पार्टी (गंगानारायण श्रेष्ठ) समूहबीच गत जेठमा पार्टी एकता भएको थियो । उनीहरुको कार्य विभाजन टुङ्ग्याउन बाँकी छ । त्यसैगरी बैठकमा पार्टीभित्रको अन्तरविरोध र समाधानका विषयमा पनि छलफल हुनेछ ।
