अमेरिकी राष्ट्रपति डोनाल्ड ट्रम्पले तीन दिने चीन भ्रमण पुरा गरेका छन् । राष्ट्रपति ट्रम्पले चीन भ्रमण र राष्ट्रपति सी जिनपिङसँगको आफ्नो वार्तालाई ‘अत्यन्त सफल, विश्वभर चर्चा योग्य र सम्झनलायक’ बताएका छन्।
बेइजिङमा दुई दिनसम्म चलेको बैठकपछि ट्रम्प यसबेला वासिङ्टनतर्फ प्रस्थान गरिसकेका छन्। चिनियाँ सरकारी सञ्चारमाध्यमका अनुसार सी जिनपिङले यस भ्रमणलाई ‘ऐतिहासिक र कोशेढुंगा साबित हुने’ बताएका छन्। भलै, दुई देशबीच कुनै ठूलो व्यापार सम्झौता भने गरिएको छैन।
ट्रम्प सवार विमान एयर फोर्स वान बेइजिङबाट अमेरिका उडिसकेको छ। उनी बाटोमै सञ्चारमाध्यमसँग कुरा गर्न सक्ने र बैठकसँग सम्बन्धित थप विवरण सार्वजनिक हुन सक्ने अनुमान गरिएको छ। ट्रम्प र सीबीच व्यापार, तेल आपूर्ति, इरान र ताइवानलगायतका विषयमा छलफल भएको बताइएको छ। यसअघि ट्रम्पले फक्स न्यूजलाई दिएको अन्तर्वार्तामा सी जिनपिङले इरानलाई सैन्य उपकरण नदिने प्रतिबद्धता जनाएको दाबी गरेका थिए।
ट्रम्पले चीन होर्मुज स्ट्रेट पुनः खुला होस् भन्ने चाहेको पनि बताएका छन्। उनका अनुसार बेइजिङले अमेरिकाबाट तेल खरिद गर्न सहमति जनाएको छ। तर अहिलेसम्म वार्ताको ठोस परिणाम वा कुनै औपचारिक सम्झौताबारे दुवै पक्षले सीमित जानकारी मात्रै सार्वजनिक गरेका छन्।
एजेन्सी
