इजरायलमा नौजना शीर्ष सैन्य अधिकारीहरूलाई बर्खास्त गरिएको छ । इजरायल रक्षा बल (आईडीएफ) का चिफ अफ स्टाफ लेफ्टिनेन्ट जनरल अयल जामिरले यी अधिकारीहरूले हमासको आक्रमण रोक्न नसकेको निष्कर्षमा पुगेको बताए । सन् २०२३ को ७ अक्टोबरमा भएको हमासको आक्रमणमा १२ सयभन्दा बढी इजरायलीले ज्यान गुमाएका थिए ।
इजरायलमा हमास आक्रमणका सम्बन्धमा निष्पक्ष छानबिनको माग राख्दै अस्ति आइतबार देशभर प्रदर्शन भएको बताइएको थियो । प्रदर्शनमा करिब पाँच लाख मानिस सहभागी भएका थिए । प्रदर्शनपछि सरकारमाथि यी अधिकारीहरूलाई बर्खास्त गर्न दबाब बढेको उल्लेख गरिएको छ ।
आईडीएफ चिफ जामिरले आइतबार ती अधिकारीहरूलाई बैठकका लागि बोलाई उनीहरूको बर्खास्तगीसम्बन्धी निर्णय सुनाइएको बताएका थिए । यस क्रममा धेरै अधिकारीलाई कडा चेतावनीसमेत दिइएको बताइएको छ । उनले विज्ञहरूको अनुसन्धान प्रतिवेदनका आधारमा सम्बन्धित कमान्डरहरूविरुद्ध थप निर्णयहरू पनि लिइने संकेत गरेका छन् । रोचक चाहिँ यो छ कि बर्खास्त गरिएका धेरैजना अधिकारी पहिले नै सेनाबाट अवकाश लिइसकेका छन् ।
अलजजिरा
