धितोपत्रको दोस्रो बजार कारोबारका लागि अनुमति पाउने दलाल कम्पनी (ब्रोकर) को सङ्ख्या निरन्तर बढेको छ । अघिल्लो आर्थिक वर्ष २०८०÷८१ मा धितोपत्रको दोस्रो बजारका लागि ८२ वटा दलाल कम्पनीले अनुमति पाएका थिए । यस आर्थिक वर्ष थप आठवटा कम्पनी थपिएर त्यसको संख्या ९० पुगेको छ ।
धितोपत्रको खरिद तथा बिक्री गर्न यही असोज मसान्तसम्ममा ९० वटा दलाल कम्पनीले अनुमति पाएको नेपाल स्टक एक्सचेञ्ज लिमिटेड (नेप्से) ले जनाएको छ । धितोपत्र व्यापारी (स्टक डिलर) को रूपमा चालु आर्थिक वर्षका लागि दुईवटा कम्पनीको सदस्यता नवीकरण गरिएको नेप्सेबाट बुझिएको छ ।
स्टक डिलरका रूपमा पछिल्लो पटक नागरिक स्टक डिलर कम्पनी लिमिटेड र नबिल स्टक डिलर लिमिटेडको सदस्यता नवीकरण भएको छ । नेप्सेका अनुसार हालसम्म दर्ता भएमध्ये दुई कम्पनीले पूर्ण कार्य गर्ने धितोपत्र दलालकोे अनुमति पाएका छन् भने बाँकी ८८ वटाले सीमित कार्य गर्ने अनुमति पाएका छन् ।
पूर्ण कार्य गर्ने धितोपत्र दलालका रूपमा एनआईएमबी स्टक मार्केट्स लिमिटेड र हिमालन सेक्युरिटिज लिमिटेडले अनुमति पाएका नेप्सेले जनाएको छ ।
