प्रधानमन्त्री सुशीला कार्कीका प्रमुख स्वकीय सचिव आदर्शकुमार श्रेष्ठले पारिवारिक सदस्य र नातेदारलाई नियुक्ति दिलाएकामा ‘जेनजी’ रुष्ट छन् । श्रेष्ठले प्रधानमन्त्रीको सचिवालयमा श्रीमतीसहितका नातेदारलाई नियुक्त गरेको खुलासा भएपछि जेनजी समूह असन्तुष्ट भएको हो ।
यही असन्तुष्टिबीच आज सोमबार (मंसिर ८) ‘द काउन्सिल अफ जेनजी’ले प्रधानमन्त्रीलाई ध्यानाकर्षणपत्र बुझाउने भएको छ । त्यसमा आबद्ध जेनजीले प्रधानमन्त्रीलाई भेटेर ध्यानाकर्षणपत्र बुझाउन लागेका हुन् ।
हामी नेपाल नामक गैरसरकारी संस्थाका संयोजक सुधन गुरुङ समूहका जेनजी अगुवा सम्राट उपाध्यायले यस विषयमा अहिले छलफल भइरहेको बताए । “यसै विषयमा हामी छलफल गरिरहेका छौँ । कति बजे प्रधानमन्त्रीलाई भेट्न जाने भनेर तय भइसकेको छैन,” उनको भनाइ छ ।
