कैलालीको गौरीगंगा नगरपालिका–७ कैलाशपुरमा १६ दिनकी सुत्केरी तुलसी नाथ, जो १९ वर्षकी मात्र थिइन, लाई आफ्नै देवरले हत्या गरेको प्रहरीको अनुसन्धानले खुलासा गरेको छ । सामान्य घरायासी विवाद र सुनको लोभमा आफूले भाउजूको हत्या गरेको देवर नवीन नाथले बयान दिएको प्रहरीले बताएको छ । नवीनलाई प्रहरीले हिजो मात्र पक्राउ गरेको थियो ।
‘भाउजू सुतेको बेला सिरानीले मुख च्यापेर हत्या गरे, उहाँले कानमा लगाएको गहना निकाले र शव बाहिर लगेर नालीमा फालिदिए’ अभियुक्त नाथको बयान उद्धृत गर्दै प्रहरीले भनेको छ । इलाका प्रहरी कार्यालय मालाखेतीका प्रमुख प्रहरी नायब उपरीक्षक (डिएसपी) रणबहादुर चन्दले सहोदर देवरले तुलसी नाथको हत्या गरेको अनुसन्धानबाट खुलेको बताए ।
‘शवको पोस्टमार्टम हुन बाकी छ । तर, घटनाको प्रकृति र पक्राउ परेका युवकको बयानका आधारमा उनैले हत्या गरेको प्रारम्भिक ठहर छ ’ उनले भने ।
भाउजूको हत्यापछि कानमा लगाएका सुनका गहना निकालेर नवीनले घर नजिकै ढुङ्गामुनि लुकाएको भन्दै आफ्नो बुवालाई दिएको सूचनाको आधारमा प्रहरीले घटनामा उनको संलग्नता भएको पुष्टि गरेको थियो ।
आफन्तले नै आफन्त मार्ने क्रम दिनदिनै बढिरहेका छन्, जसले समाज दिनप्रतिदिन हिंस्रक बन्दै गरेको पुष्टि गर्छ ।
