नेपाली कांग्रेसका सभापति तथा पूर्वप्रधानमन्त्री शेरबहादुर देउवा उपचारका लागि आज राति सिंगापुर प्रस्थान गर्दै छन् । श्रीमती डा. आरजू राणा देउवासहित सभापति देउवा राति ११ बजे सिंगापुर एअरलाइन्सको उडान नम्बर एसक्यु ४४१ मा प्रस्थान गर्ने कार्यक्रम छ ।
भदौ २४ गतेको जेनजी विध्वंशको क्रममा बूढानीलकण्ठस्थित निवासमा आक्रमण गरी देउवा दम्पतीलाई घाइते बनाइएको थियो । आगो लगाएर निवास समेत खरानी बनाइएपछि उनीहरु झण्डै तीन साता सैनिक अस्पतालमा उपचाररत थिए । देउवाको टाउँकामा १२ वटा टाँका लगाउनु परेको थियो ।
हाल जावलाखेलस्थित ससुरालीमा बस्दै आएका देउवा असोज २८ गते काँग्रेस केन्द्रीय कार्यालयमा सार्वजनिक भएर उपसभापति पूर्णबहादुर खड्कालाई कार्यवाहकको जिम्मेवारी दिएका थिए । त्यस यता सार्वजनिक कार्यक्रममा कतै नदेखिएका देउवा थप उपचारको लागि सिंगापुर जान लागेका हुन् ।
