मानव तस्करी एवम् सरकारी लिखत कीर्तेको कसुरमा पक्राउ परेका कोशी प्रदेशका निवर्तमान मन्त्री लिलाबल्लभ अधिकारीलाई प्रहरीले विशिष्ट व्यक्तिका लागि छुट्याइएको थुनुवा कक्षमा राखेको छ ।
जिल्ला प्रहरी परिसर काठमाडौंले भद्रकालीमा निर्माण गरेको आधुनिक भवनमा विशिष्ट व्यक्तिका लागि छुट्टै हिरासतकक्ष छुट्याएको छ । निवर्तमान मन्त्री अधिकारीलाई त्यहीँ राखिएको प्रहरी स्रोतको भनाइ छ ।
‘जानकारका अनुसार भीआईपी र अरु कक्षामा खासै भिन्नता नभए पनि शौचालय लगायतको व्यवस्था भने छुट्टै छ ।
काठमाडौं प्रहरीको आधुनिक भवन एक अर्ब बढी लागतमा बनाइएको हो । त्यस भवनमा सामाजिक अपराध, लागुऔषध प्रयोग र कारोबार गर्ने, जघन्य अपराध गर्नेलाई छुट्टाछुट्टै राख्न हिरासत संरचना बनाइएको छ । काठमाडौं प्रहरी नयाँ भवनमा सरृेपछि भीआईपी कक्षामा राखिएका राजनीतिक थुनुवा अधिकारी पहिलो हुन् । अधिकारी भीआईपी कक्षमा एक्लै हुने भएपछि प्रहरीले बैंकिङ कसुरका केही अभियुक्तलाई पनि उनीसँगै हिरासतमा पठाएको छ ।
निवर्तमान मन्त्री अधिकारी टोकियो महानगर र आर्ट काउन्सिल टोकियोले आयोजना गरेको एक कार्यक्रममा सहभागी हुन भन्दै ११ कात्तिकमा जापान उडेका थिए । तर, उनीसँगै जापान गएका खोटाङको केपिलासलगढी गाउँपालिका–४ का ४१ वर्षीय जनक राई, खोटाङको ऐसेलुखर्क गाउँपालिका–२ का ३७ वर्षीय दावा शेर्पा र रसुवाको कालिका गाउँपालिका–५ का २१ वर्षीय कञ्चन देवकोटा नारिता विमानस्थलको अध्यागमनमा केरकारमा परेका थिए ।
नारिता विमानस्थलको अध्यागमनले मन्त्री अधिकारीसहित चारै जनालाई होल्डमा राखेर डिपोर्ट गरिदिएको थियो । डिपोर्ट भएपछि नेपालको अध्यागमन विभागले थप अनुसन्धानका लागि तीन जनालाई उपत्यका अपराध अनुसन्धान कार्यालयको जिम्मा लगाएको थियो । मन्त्री अधिकारी भने हिजो पक्राउ परेका थिए ।
