गृहमन्त्री रमेश लेखकले सत्ता गठबन्धनमा कुनै समस्या नभएको बताएका छन् । हिजो साँझ अबेर बालुवाटारमा बसेको सत्तारुढ दल कांग्रेस एमालेको र एमालेको उच्च स्तरीय संयन्त्रको बैठकपछि गृहमन्त्री लेखकले बाहिर चर्चा भए जस्तो गठबन्धनमा कुनै समस्या नभएको बताएका हुन् ।
उनले भने, ‘हाम्रो बीचमा कुनै समस्या छैन । सरकार र दुई दलमा समस्या भयो भन्ने कुराहरु असत्य हुन् । दुई शीर्ष नेता (शेरबहादुर देउवा केपी शर्मा ओली) सहित बैठक बसेका छौं ।’
सत्ता गठबन्धनमा कटुता बढ्दै जाँदा ओली देउवाले भेट गरेर संयन्त्रको बैठक डाकेका थिए । बैठक हिजो बिहानै बस्ने तयारी थियो । तर, कांग्रेस महामन्त्री गगनकुमार थापा बारामा आयोजित एउटा कार्यक्रममा गएपछि उनको सहभागिताका लागि साँझ राखिएको थियो ।
उनले शिक्षकको आन्दोलनको विषयमा समान्य छलफल भएको जानकारी दिए । आगामी संसदको अधिवेशनबाट शिक्षकको समस्या समाधान गरिने उनले बताएका छन् । शिक्षकहरु अध्यादेशबाटै भएपनि ऐन जारी हुनु पर्ने माग राख्दै १५ दिनदेखि आन्दोलनमा छन् ।
