नागरिक उन्मुक्ति पार्टी (नाउपा) ले सरकारबाट बाहिरिने निर्णय गरेको छ। आज शनिबार बसेको संसदीय दलको बैठकले सरकार छोडेर प्रतिपक्षमा बस्ने निर्णय गरेको अध्यक्ष रञ्जिता श्रेष्ठले सञ्चारकर्मीहरुलाई जानकारी दिएकी छन् ।
‘आजको संसदीय दलको बैठकबाट सरकार छोड्ने निर्णय गरेका छौँ,’ श्रेष्ठ भन्छिन्, ‘यसको जानकारी सभामुख र प्रधानमन्त्रीलाई गराउँछौँ। पर्सी २३ असारको संसद् बैठकदेखि प्रतिपक्षमा बस्छौँ।’ नाउपाबाट संघीय सरकारमा अरुण चौधरी संस्कृति, पर्यटन तथा नागरिक उड्यन राज्यमन्त्रीको जिम्मेवारीमा छन्। उनले प्रधानमन्त्रीलाई राजीनामा बुझाउने अध्यक्ष श्रेष्ठको भनाइ छ ।
सुदूरपश्चिम प्रदेशका मुख्य मन्त्रीले त्यहाँको सरकारका वन मन्त्रीलाई अस्ति बर्खास्त गरेका थिए । यसपछि नाउपा र सरकारबीच खटपटी बढेको थियो । यद्यपि सत्ता साझेदार नेपाली कांग्रेसका सभापति शेरबहादुर देउवाले नाउपालाई सरकारमा सामेल गराउनु पर्ने अडान राखिरहेका छन् । उनले सुदूरपश्चिमका मुख्य मन्त्रीलाई नाउपालाई प्रदेश सरकारमा सामेल गराउन निर्देशन दिइसकेका छन् ।
