नेकपा (एमाले) ले आफ्नो आसन्न ११ औं महाधिवेशनको उद्घाटन समारोहमा विघठित संसदमा प्रतिनिधित्व गर्नेसहित १६ दललाई निम्तो दिने भएको छ । २४ भदौसम्मको सत्ता सहयात्री नेपाली कांग्रेसका सभापति शेरबहादुर देउवालाई एमाले नेताहरु रघुवीर महासेठ, महेश बर्तौलालगायत उनको निवासमै गएर आज निमन्त्रणा दिएका छन् । आजै नेपाली कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डलाई पनि भेटेर निम्तो दिइने बुझिएको छ ।
महाधिवेशनमा शुभकामना दिन विघठित प्रतिनिधिसभामा प्रतिनिधित्व गरेका सबै दलहरुलाई बोलाइने भएको छ । जसअनुसार कांग्रेस, रास्वपा, राप्रपा, दुई जसपा, लोसपा, जनमत, नागरिक उन्मुक्ति, राष्ट्रिय जनमोर्चा, नेपाल मजदुर किसान पार्टीलाई निम्त्याइने भएको छ । रास्वपाका सभापति रवि लामिछाने कारागारमा रहेकाले कार्यवाहक सभापति डिपी अर्याललाई अतिथिमा निम्त्याईने छ ।
विघठित प्रतिनिधिसभामा नभएका मध्ये राप्रपा नेपालका अध्यक्ष कमल थापाले निम्तो पाउनेछन् । यस्तै, नेत्रविक्रम चन्द विप्लव, मोहन वैद्यको क्रान्तिकारी कम्युनिष्ट पार्टीलाई बोलाइने अध्यक्ष केपी शर्मा ओली निकट रहेका एमालेका एक नेताको भनाइ छ ।
नयाँ खुलेका दलहरुलाई भने एमालेले बोलाउने छैन । उज्यालो नेपाल, श्रम संस्कृति, प्रगतिशील नागरिक पार्टीलगायतलाई भने एमालेले निमन्त्रणा नगर्ने भएको छ ।
